Bekijk hier de video
Ze hebt um e paktEne Rens Blom sprong vief meter tachtig
Over nun latte
Ik dagge
Net as nun hoop andern
Knap
Mar probeer ut de volgnde keer is
Zonder stok
Hek vaker
Dak wat minder imponeert bun
Dan de leu
Die ut wettn kunt
Zo hej Hendrikje Van Andel Schippers
Un onmeundig oald wief
Hondervieftien joar
Das mooi
Denk ik dan
Mar aj noe oe hele leamn in de Sahel haddn e woont
Was ut warkeluk nun prestatie zonder weerga wes
Of de Space Shuttle
Effen op en neer noar nun ding
Dat dr al hing
En oeteindeluk haddn ze allene
De metgereisde stukadoor mar neudig
Ik denk dan
Woarum nit mooi op de automatische piloot
De onmettelukke ruumte in
Kiekn woarj oet komt
Das toch de oetdaging van elk mens
De grenzn verleggn
De honderd meter loopn
In exact nul secondn
En dan lulle wie nans meer oaver
De leu bunt lui
Bunt blie met nun centimeter winst
En noa die centimeter winst
Bunt ze blie met nun millimeter winst
En is dr straks niemand
Den nit stille steet
Nun nichtje van mie haaldn heur tiepdiploma met nun verenigingsrecord
467 aanslaagn per minuut
Ik zee
Knap
Mar ie haddn terrorist mottn wordn
Dat bedoel ik
Wie denkt te kleen
Zo bunt dr keerls die heune traint
Um drugs op te spoorn
Wijl ze volgns mie
Better
An de waterpiepe haddn kunn liggn
Zich ofvroagnd
Of den hond dat eigenluk wal leuk vindt
Ie kunt zoveel meer oet nun hond haaln
Vroag ut de chinezen mar
Dat vonk wal mooi
Dat de langste mens ter weerld
In China woont
En dat e doarmet nun kostuum had e wonn
Op de televisie
Van de Chinezen
Verwoch ik veulle
Nit zo bleu as de Amerikanen
Nit zo rood as de Russen
Chinezen greuijt in alle stilte
En dat geet ze ut universum opleavern
Die stoat ijs en weder dienende
As eerste op Mars
Umdat ze de grond neudig bunt
En dat wiele dan
Met onze treurige langzame denkn
Eenmoal op de Rooie Planeet arriveert
En nun restaurant zeukt
Allene mar noar De Lange Muur kunt
Op ut moment daj goat veur de centimeters
Kuj geen stap meer verzettn
Oaver nog gin doezend joar
Sprunk nun Angolese 5 joarige
567 meter ver
Tijdens de eerste Universele Spelen
Ut toernooi vind plaats op de planeet Olympia
Ontdekt deur zeumn stark vermagerde astronauten
In tweedoezendvieve vertrokkn
En ut Angolese meeke
Hef dr veer joar oaver e doan
Um ut stadion te bereikn
De mens mot veuroet
En geet ut nit veuroet
Dan mot ut kapot
En alle ge ren
Gespring
Gevoetbal
Geschrief
Gefilm
Gekiek
Gejammer
Gelieke
Verkloart enkel de onmacht
Van nun keerl
Met nun stok
Den de latte nit te hoge durft te leggn